Laust er til umsóknar fullt starf doktorsnema í landfræði eða ferðamálafræði við Líf- og umhverfisvísindadeild á Verkfræði- og náttúruvísindasviði Háskóla Íslands. Starfið er tímabundið til tveggja ára.

Starfið er í samstarfi við, og verður sérstakur verkþáttur innan þverfaglegs verkefnis sem kallast Vöktun og stjórnun gesta á friðlýstum svæðum og öðrum náttúruskoðunarstöðum: nýjar áskoranir, nýjar lausnir fyrir mannkyn (Visitor monitoring and management in protected and recreational areas: new challenges og novel solutions for the Anthropocene – VIMAS). Starfið er fjármagnað til tveggja ára í gegnum ESB Horizon Marie Sklodowska-Curie Action. Tíu doktorsnemar vinna í verkefninu.

Starfið getur verið hvort sem er á sviði landfræði eða ferðamálafræði og mun beina sjónum að sjálfbærri stjórnun ferðamennsku og útivistar innan og í kringum friðlýst svæði, með sérstakri áherslu á að bæta vöktun og efla félagslega þátttöku í stýringu ferðamennsku. Doktorsneminn mun kanna hvernig náttúrutengd ferðaþjónusta mótar og vöruvæðir náttúruna út frá sjónarhornum nýfrjálshyggju og umhverfisréttlætis. Enn fremur hvernig vöxtur ferðaþjónustu hefur áhrif á almenningarrétt, landnotkun og nærsamfélög. Gert ráð fyrir að doktorsneminn taki þátt í þjálfunarbúðum þar sem lögð er áhersla á vísindalega færniþjálfun. Auk þess mun hann taka þátt í ýmis konar annarri starfsemi sem tengist VIMAS netinu og vettvangsvinnu til að afla nauðsynlegra gagna fyrir verkefnið.

VIMAS-samstarfsnetið samanstendur af sjö háskólum í sex löndum Norður-Evrópu og nýtur stuðnings fjórtán samstarfsaðila úr viðskiptalífinu, opinberum stofnunum og aðilum á sviði hagnýtra rannsókna frá Evrópu og Norður-Ameríku. Nánari upplýsingar má finna á heimasíðu VIMAS.

• Meistaragráða í landfræði, ferðamálafræði, eða skyldum greinum

• Hæfni til að vinna sjálfstætt og í teymi

• Færni í að kynna niðurstöður verkefnisins í ritrýndum vísindagreinum og á ráðstefnum innanlands og erlendis

• Góð enskukunnátta í töluðu og rituðu máli

• Æskilegt er að umsækjandi hafi færni í tölfræði, ArcGIS, PPGIS og kerfisgreiningu

Umsækjendur mega ekki hafa verið búsettir eða stundað vinnu eða nám hér á landi í meira en 12 mánuði á síðustu 36 mánuðum fyrir ráðningardag (kröfur frá styrktaraðila ESB Horizon, svokölluð hreyfanleikaregla)

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Eftirfarandi gögn skulu fylgja umsókn:

• Ferilskrá

• Kynningarbréf þar sem fjallað er um hvernig umsækjandi uppfyllir þær hæfnikröfur sem settar eru fram í auglýsingunni og hvað hann telur sig geta lagt af mörkum til starfsins

• Afrit af prófskírteinum og meistararitgerð

• Upplýsingar um umsagnaraðila

Ráðning er háð því að nemandinn sæki formlega um doktorsnám við deildina og verði samþykktur í það, stundi hann ekki doktorsnám nú þegar.

Starfið er við Háskóla Íslands í Reykjavík og er gert ráð fyrir að doktorsneminn verði að mestu staðsettur þar á meðan á náminu stendur.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknafrests.

Við ráðningu í störf í Háskóla Íslands er tekið mið af jafnréttisáætlun skólans. Vakin er athygli á málstefnu Háskóla Íslands.

Háskóli Íslands hefur frá stofnun verið undirstaða atvinnulífs og framfara í íslensku samfélagi. HÍ er jafnframt framsækinn rannsóknarháskóli og virkur þátttakandi í alþjóðlegu vísindasamstarfi.

Háskóli Íslands er stærsti háskóli landsins og býður upp á hátt í 400 námsleiðir í grunn-, meistara- og doktorsstigi. Um 14.000 nemendur stunda nám við skólann, þar af yfir 2.000 alþjóðlegir nemar.

Við Háskóla Íslands starfa yfir 1.800 manns. Skólinn leggur áherslu á að laða til sín fjölbreyttan hóp starfsfólks og stúdenta í alþjóðlegt fræðasamfélag þar sem akademískt frelsi, fagmennska, jafnrétti, fjölbreytileiki og inngilding eru í öndvegi.

Nánar um Háskóla Íslands, fræðasvið hans og deildir