Laust er til umsóknar fullt starf nýdoktors eða reynslumikils tölfræðings til þriggja ára við Miðstöð í lýðheilsuvísindum, við Háskóla Íslands.

Miðstöð í lýðheilsuvísindum (MLV) er framsækin rannsóknastofnun við Háskóla Íslands þar sem metnaðarfullar rannsóknir á sviði lýðheilsu eru stundaðar í alþjóðlegu samstarfi. Lögð er áhersla á hágæða aðferðafræði á sviði faraldsfræði og líftölfræði. Heilsa kvenna er eitt grunnstef rannsókna við MLV og mun verkefni þess sem hlýtur starfið snúa meðal annars að rannsóknum á áhrifum fegrunaraðgerða og þyngdarstjórnunarlyfja á heilsu kvenna.

Staðan er fjármögnuð af Rannsóknasjóðiog eru ábyrgðarmenn verkefnisins Unnur Anna Valdimarsdóttir og Thor Aspelund, prófessorar við MLV, Læknadeild HÍ.

Nýdoktorinn/tölfræðingurinn verður hluti af rannsóknateymi MLV og tekur þátt í öllum þáttum rannsóknanna sem eru:

• Skipulag og áætlanagerð gagnagreininga.

• Tölfræðileg úrvinnsla.

• Túlkun niðurstaðna í máli og myndum og ritun vísindagreina um niðurstöður.

• Almenn gagnavinnsla, hreinsun og úrvinnsla gagna rannsóknarinnar Áfallasaga kvenna og úr lýðgrunduðum heilbrigðisgagnagrunnum.

• Uppbygging gagnagrunna við MLV og tölfræðileg ráðgjöf við nemendur í rannsóknartengdu námi.

• Meistara- eða doktorspróf í sviði lýðheilsuvísinda, þ.á.m. faralds- og tölfræði, eða öðrum tengdum greinum.

• Reynsla af tölfræðilegri úrvinnslu stórra gagnasafna/langtíma rannsókna á sviði lýðheilsu, þar á meðal lýðgrundaðra gagnagrunna.

• Góð færni í myndrænni og tölulegri birtingu á rannsóknarniðurstöðum.

• Góð enskukunnátta í töluðu og rituðu máli.

• Góð tölvukunnátta og reynsla af tölfræðiforritinu R (STATA og SAS er kostur)

• Góð samskiptahæfni og lipurð í mannlegum samskiptum.

• Reynsla af vinnu í rannsóknarhópum æskileg.

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Umsækjendur skulu senda ferilskrá sína, prófskírteini, auk bréfs sem tilgreinir rannsóknarreynslu þeirra, lista yfir birtingar, markmið í starfi, auk nafna, síma og netfanga tveggja akademískra meðmælenda.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Staðan er styrkt til eins árs í senn af Rannsóknarsjóði Vísinda- og tækniráðs.

Gert er ráð fyrir að viðkomandi hefji störf sem fyrst, eftir nánara samkomulagi.

Við ráðningu í störf í Háskóla Íslands er tekið mið af jafnréttisáætlun skólans.

Vakin er athygli á málstefnu Háskóla Íslands.

Heilbrigðisvísindasvið Háskóla Íslands er í fararbroddi á sviði heilbrigðismála á Íslandi og gegnir lykilhlutverki í uppbyggingu íslenska heilbrigðiskerfisins með menntun heilbrigðisstarfsmanna. Helstu sérfræðingar þjóðarinnar í heilbrigðisvísindum koma að kennslu og rannsóknum á sviðinu.