Laust er til umsóknar fullt starf nýdoktors við Rannsóknasetur Háskóla Íslands í Þingeyjarsveit og Hafrannsóknastofnun. Starfið er styrkt af Nordforsk tímabundið til tveggja ára og er hluti af þverfaglegu og alþjóðlegu rannsóknarverkefni sem nefnist Marine Phycotoxins in the Arctic: An Emerging Climate Change Risk (PHATE).

Nýdoktorinn mun sinna rannsóknum á skriflegum heimildum um viðhorf Íslendinga til skelfisks. Hann mun sinna rannsóknum á Íslandi með hliðsjón af rannsóknum á Norðurlöndunum og í samstarfi við aðra þátttakendur í verkefninu. Niðurstöðurnar munu gefa nýja innsýn í menningarlega og samfélagslega þætti sem hafa áhrif á nýtingu sjávarafurða. Fyrra árið mun nýdoktorinn stunda rannsóknir á vegum Rannsóknaseturs Háskóla Íslands í Þingeyjarsveit sem felur í sér vinnulotur í Mývatnssveit. Seinna árið mun nýdoktorinn sinna rannsókninni hjá Hafrannsóknastofnun í Hafnarfirði.

Auður Aðalsteinsdóttir, rannsóknarlektor í umhverfishugvísindum og forstöðumaður Rannsóknaseturs HÍ í Þingeyjarsveit, og Sara Harðardóttir, svifþörungafræðingur á Umhverfissviði Hafrannsóknastofnunar, leiða rannsóknina í samstarfi við innlent samstarfsfólk og erlenda sérfræðinga.

• Söfnun og greining íslenskra ritaðra heimilda um skelfisk

• Samþætting gagna við niðurstöður úr öðrum þáttum verkefnisins

• Miðlun rannsóknaniðurstaðna með áherslu á birtingu ritrýndra greina

• Þátttaka í alþjóðlegum fundum og ráðstefnum

• Doktorspróf í menningarfræði eða tengdu fagi, svo sem á sviði þjóðfræði eða sagnfræði

• Þekking og áhugi á íslenskri menningu, sjálfbærni og bláum hagkerfum er kostur

• Reynsla af þverfaglegu og alþjóðlegu starfi er kostur

• Frumkvæði og skipulagshæfileikar

• Sjálfstæði í vinnubrögðum og geta til að vinna í teymi

• Góð íslensku- og enskukunnátta, í ræðu og riti

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Gert er ráð fyrir því að nýdoktorinn hefji störf 15. febrúar 2026 eða eftir nánara samkomulagi.

Eftirfarandi gögn skulu fylgja umsókn:

• Ferilskrá

• Ritaskrá þar sem umsækjandi tilgreinir þau ritverk, allt að átta talsins, sem hann telur veigamest

• Skrifleg lýsing (ein blaðsíða) á ensku á því hvers vegna umsækjandi hefur áhuga á stöðunni og hvernig hann hyggst nálgast verkefni sitt innan ramma rannsóknarinnar

• Afrit af prófskírteinum

• Netföng og símanúmer hjá tveimur umsagnaraðilum

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknafrests.

Við ráðningu í störf í Háskóla Íslands er tekið mið af jafnréttisáætlun skólans. Vakin er athygli á málstefnu Háskóla Íslands.

Háskóli Íslands hefur frá stofnun verið undirstaða atvinnulífs og framfara í íslensku samfélagi. HÍ er jafnframt framsækinn rannsóknarháskóli og virkur þátttakandi í alþjóðlegu vísindasamstarfi.

Háskóli Íslands er stærsti háskóli landsins og býður upp á hátt í 400 námsleiðir í grunn-, meistara- og doktorsstigi. Um 14.000 nemendur stunda nám við skólann, þar af yfir 2.000 alþjóðlegir nemar.

Við Háskóla Íslands starfa yfir 1.800 manns. Skólinn leggur áherslu á að laða til sín fjölbreyttan hóp starfsfólks og stúdenta í alþjóðlegt fræðasamfélag þar sem akademískt frelsi, fagmennska, jafnrétti, fjölbreytileiki og inngilding eru í öndvegi.

Nánar um Háskóla Íslands, fræðasvið hans og deildir

Hafrannsóknastofnun, rannsókna- og ráðgjafarstofnun hafs og vatna er stærsta rannsóknastofnun landsins á sviði hafs- og vatnarannsókna og gegnir auk þess ráðgjafarhlutverki varðandi skynsamlega nýtingu og verndun auðlinda hafs og vatna. Hún heyrir undir atvinnuvegaráðuneytið.

Mikill hluti starfseminnar tengist alþjóðlegu samstarfi við erlendar hafrannsóknastofnanir og háskóla. Fjölbreytt rannsóknarstarfsemi fer fram hjá stofnuninni, þar á meðal rannsóknir á vistkerfum sjávar og ferskvatns, fiskeldi og fjölmörg verkefni á sviði fiskifræði. Innlent og alþjóðlegt samstarf er mikilvægur þáttur í starfsemi stofnunarinnar.

Stofnunin hefur nýlega sett sér nýja framtíðarstefnu fyrir næstu fimm ár, sem felur í sér að efla rannsóknir á loftslagsbreytingum og vistfræði. Stofnunin leggur áherslu á jákvætt og heilbrigt vinnuumhverfi og menningu.

Nánar um Hafrannsóknastofnun

Nánari upplýsingar um starfið veita:

Auður Aðalsteinsdóttir, forstöðumaður Rannsóknaseturs HÍ í Þingeyjarsveit audurada@hi.is

Sara Harðardóttir, sérfræðingur á Hafrannsóknastofnun sara.hardardottir@hafogvatn.is