Við leitum að nýdoktor til að vinna að rannsóknaverkefni við Lífvísindasetur Háskóla Íslands sem snýr að auðkenningu á starfsemi æðaþels samfara hormónabreytingum í losti. Æðaþelið er örþunnt lag af frumum á innanverðum æðum sem tekur þátt í að miðla blóðstorku og bólgusvari líkamans. Breytt starfsemi æðaþels er fylgifiskur bráðasjúkdóma en einnig hjarta- og æðasjúkdóma sem eru leiðandi dánarorsök í heiminum. Umsækjandi þarf að hafa sterkan grunn í sameindalíffræði og áhuga á fjölþátta gagnaúrvinnslu.

Nýdoktorinn mun leiða og framkvæma frumulíffræði og sameindalíffræði vinnu sem styðst m.a. við siRNA/shRNA niðurslátt, qPCR, western blottum, smásjárvinnu, lífefnafræði mælingar ofl. Þar sem verkefnið er þverfræðilegt, gæti einnig komið til þess að nýdoktorinn stýri úrvinnslu og samþættingu raðgreiningar og/eða smásameinda gagna og klínískra gagna og uppfæra tilgátur um mechanisma að baki breyttri starfsemi æðaþels.

• Doktorsgráða í sameindalíffræði, lífefnafræði, lífeindafræði eða sambærilegum fögum

• Reynsla af frumuvinnu og aðferðum í sameindalíffræði

• Þekking á tilbúningi og úrvinnslu mismunandi líffræðilegra gagna

• Fyrsti höfundur á a.m.k tveimur eða fleiri ritrýndum fræðigreinum

• Góð ensku kunnátta í töluðu og rituðu máli

• Geta til að starfa sjálfstætt að rannsóknum.

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Verkefnið er leitt af Óttari Rolfssyni prófessor og mun starfsmaður verða hluti að alþjóðlegu rannsóknarteymi staðsettu í Reykjavík, Rouen og Kaupmannahöfn og mun hugsanlega þurfa að ferðast milli staða til að innleiða og tileinka sér rannsóknaraðferðir.

Lífvísindasetur Háskóla Íslands (www.lifvisindi.hi.is) er samstarf allra þeirra sem vinna að lífvísindum við háskóla og stofnanir á Íslandi. Setrið hefur byggt alþjóðlega samkeppnishæfa aðstöðu til rannsókna á sviði lífvísinda en innan þess starfa á annað hundrað vísindamanna og nemenda.

Viðkomandi þarf að geta hafið störf sem fyrst og eigi síðar en í September 2024. Starfið er fullt starf með möguleika á ráðningu til allt að þriggja ára.

Eftirfarandi gögn þurfa að fylgja umsókninni:

• Ferilskrá.

• Stutt lýsing á því hvernig umsækjandi uppfyllir ofangreind skilyrði og hvernig þau telja sig geta lagt til verkefnisins (1 bls hámark).

• Staðfesting náms.

• Meðmælabréf frá tveimur aðilum, fyrri leiðbeinendum/vinnuveitendum.

• Umsækjendur geta einnig skilað doktors ritgerðum og greinum ef við á að hámarki 5 slík skjöl.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin.

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2.

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna%5Fhaskola%5Fislands.

Heilbrigðisvísindasvið Háskóla Íslands er í fararbroddi á sviði heilbrigðismála á Íslandi og gegnir lykilhlutverki í uppbyggingu íslenska heilbrigðiskerfisins með menntun heilbrigðisstarfsmanna. Helstu sérfræðingar þjóðarinnar í heilbrigðisvísindum koma að kennslu og rannsóknum á sviðinu.